ശ്രീമദ് അയ്യപ്പ ഭാഗവതത്തിന്റെ മഹത് സന്ദേശം!

ജീവിതത്തെ കുറിച്ച് യാതൊരറിവും ഇല്ലാതെയാണ് നാമോരുത്തരും ഈ ഭൂമിയിൽ ജനിക്കുന്നത്. ജനിക്കുന്നതിന് മുൻപ് നാം എവിടെയായിരുന്നു എന്നോ, മരിച്ചുകഴിഞ്ഞാൽ എങ്ങോട്ടാണ് പോകുന്നത് എന്നോ നമ്മൾക്ക് അറിയില്ല.അങ്ങനെ ഒരുതരം അനിശ്ചിതത്വത്തിലൂടെയാണ് നാം കടന്ന് പൊയ്‌ക്കൊണ്ടിരിക്കുന്നത്.
ഇവിടെ നമ്മൾക്ക് ചെയ്യുവാൻ സാധിക്കുന്നത് നിത്യനും നിർമ്മലനും നമ്മുടെ നിലനില്പിനാധാരവും ആനന്ദസ്വരൂപനുമായ അയ്യപ്പനെ ശരണം പ്രാപിക്കുക എന്നുള്ളതാണ്.
ഏറിയാൽ നൂറ് വയസ്സുവരെയുള്ള ആയുസ്സിൽ പകുതിയും രാത്രിയായി കടന്ന് പോകുന്നു. പിന്നീടുള്ള പകുതിയിൽ നിന്നും ബാല്യവും വാർദ്ധക്യവും കുറച്ചുകഴിഞ്ഞാൽ, യൗവ്വന കാലം മാത്രമാണ് തന്റെ സ്വാതന്ത്ര്യത്തിൽ ഒരു മനുഷ്യന് ഉള്ളത്. എന്നാൽ ഈ കാലഘട്ടം, സംസാരചക്രത്തിലെ സുഖദുഃഖങ്ങളിൽ പെട്ട് തിരക്കിട്ട് കഴിഞ്ഞുപോകുന്നു. വളരെ ദുർലഭമായി കിട്ടുന്ന മനുഷ്യജന്മത്തിൽ അയ്യപ്പചിന്തയും തത്വവിചാരവും കൊണ്ട് സദ്‌വാസനകളെ വളർത്തി ആന്തരികസ്വാതന്ത്ര്യം അഥവാ മോക്ഷം സമ്പാദിക്കുവാനുള്ള വിവേകം നേടുന്നവരാണ് സുകൃതികൾ. ഈയൊരു ലക്ഷ്യത്തിലേക്കുള്ള മാർഗമായിട്ടാണ് അയ്യപ്പ തത്വദർശനവും ശബരിമല വ്രതചര്യകളും നമ്മുടെ പൂർവികരായ ഋഷീശ്വരന്മാർ വിഭാവന ചെയ്തത്. കഥകൾക്കും ആചാരങ്ങൾക്കും ഒപ്പം അതിന്റെ പിറകിലുള്ള തത്വങ്ങൾ മനസിലാക്കി സമർപ്പണ ഭാവത്തോട് കൂടി ആചരിക്കുമ്പോൾ സർവ്വേശ്വരനായ അയ്യപ്പസ്വാമിയുടെ അനുഗ്രഹം ഭക്തർക്ക് ലഭ്യമാകും.

ഭഗവദ് തത്വങ്ങൾ അറിയാനുള്ള മാർഗ്ഗം ആണ്അയ്യപ്പ ഭാഗവതം കാട്ടി തരുന്നത്. ഈരേഴു 14 കാണ്ഡങ്ങളിലായി അയ്യപ്പദർശനങ്ങൾ ലളിതമായും വ്യക്തമായും പ്രതിപാദിച്ചിരിക്കുന്നു. ഭാഗവതം എന്ന വാക്കിന് നമ്മുടെ ഋഷീശ്വരന്മാർ മറ്റൊരു മനോഹരമായ അർത്ഥവ്യാഖ്യാനം ചെയ്തിട്ടുണ്ട്.
“ഭാ” എന്നാൽ ഭാസിക്കുന്നത് അഥവാ പ്രകാശിക്കുന്നത് എന്നർത്ഥം. അതായത് പരമാർത്ഥസ്വരൂപം, ഈശ്വരൻ!
“ഗ” എന്ന അക്ഷരം അറിയുക, പോവുക തുടങ്ങിയ അർത്ഥങ്ങൾ സൂചിപ്പിക്കുന്നു. അതായത് നമ്മുക്ക് ഈശ്വര സന്നിധിയിൽ എത്തണം.നമ്മുക്കും ഭഗവാനും ഇടയിൽ എന്താണ് തടസ്സമായിട്ടുള്ളത്? സംസാര സാഗരം – നാം ചിന്തകളിലും പ്രവർത്തനങ്ങളിലും മുഴുകുമ്പോൾ പലപ്പോഴും ഭഗവാനെ മറന്നു പോകുന്നു. ആ മറവിയിൽ നിന്ന് കര കയറുവാൻ അഥവാ ആ സാഗരത്തെ തരണം ചെയ്യുവാൻ നമ്മുക്ക് ഒരു ഉപാധി/തോണി വേണം. ഇതിനെ “തരണി” എന്ന് പറയുന്നു. ആ തോണി ശ്രേഷ്ഠം – വരപ്രദം ആയിരിക്കണം. അതായത് ബലമുള്ളത് ആയിരിക്കണം. “വ” എന്ന അക്ഷരം ആ ബലത്തെ അഥവാ വരത്തെ സൂചിപ്പിക്കുന്നു.
“ഭാ” – ഭഗവാൻ
“ഗ” – അറിയുക
“ത” – തരണി
അങ്ങിനെ നോക്കുമ്പോൾ “ഭാഗവതം” എന്നാൽ “ഭഗവാന്റെ സന്നിധിയിലേക്ക് നമ്മെ എത്തിക്കുന്ന ശ്രേഷ്ഠമായ തോണി” എന്നാകുന്നു അർത്ഥം.