വിശ്വരൂപദർശനം

ആയിരം തലകളും , പലവിധ രസങ്ങൾ പ്രകടമാക്കുന്ന നേത്രാവലികളും, വിസ്തൃതമായ പാദങ്ങളും ഉള്ള ഭഗവാന്റെ വിശ്വരൂപം മഹർലോകം വരേയ്ക്കും നിറഞ്ഞു നിന്നു. ഭഗവാന്റെ തിരുമുഖം സ്വർഗ്ഗലോകവും ഹൃദയം ഭുവർലോകവും തിരുവയർ ഭൂലോകവും ആയി വിളങ്ങി. കണ്ണുകൾ ആദിത്യചന്ദ്രന്മാരും അഗ്നിയും ആയി പ്രകാശിച്ചപ്പോൾ ഭഗവാൻ ചൂടിയിരുന്ന പുഷ്പങ്ങൾ നക്ഷത്രസമൂഹമായി കണ്ടു. ആ തിരുവുടലിൽ കണ്ട രോമരാജികൾ വൃക്ഷങ്ങളായും ഭഗവാന്റെ കരങ്ങൾ ധർമ്മമായും ആയുധങ്ങൾ അധർമ്മമായും ധ്രുവങ്ങൾ ഗുണകളായും കാണപ്പെട്ടു. ഭഗവന്റെ ശ്രവണേന്ദ്രിയങ്ങൾ സത്യാസത്യങ്ങളായും ശ്വാസം സമസ്തജീവികളുടെ പ്രാണവായു ആയും പ്രകടമായി
ആകാശം മുട്ടി വളർന്നു നിൽക്കുന്നതും തേജസ്സുറ്റതുമായ ആ വിശ്വരൂപത്തിൽ ഈ പ്രപഞ്ചത്തിൽ കാണപ്പെടാവുന്ന ഏതൊരു കാഴ്ചയും കാണുമാറായി. ത്രിമൂർത്തികളും ദേവഗണങ്ങളും യക്ഷരക്ഷോ സമൂഹങ്ങളും അസുരന്മാരും കിംപുരുഷന്മാരും സിദ്ധന്മാരും മഹർഷിമാരും ഗന്ധർവ്വന്മാരും എന്ന് വേണ്ട ഭൂതലത്തിൽ വസിക്കുന്ന 82 ലക്ഷത്തിൽ പരം ജീവജാലങ്ങളെയും ആ രൂപത്തിൽ നിറഞ്ഞു തിളങ്ങി . കാലചംക്രമണങ്ങളും യുഗചംക്രമണങ്ങളും ദശാവതാരങ്ങളും സൃഷ്ടിയും പ്രളയവും യുദ്ധങ്ങളും എല്ലാ ആരൂപത്തിൽ പ്രകടമായി. ജഗത്തുമുഴുവനും ആ രൂപത്തിൽ കാണപ്പെട്ടു.
തിരു ദംഷ്ട്രകളിൽ നിന്നും കഠിന ശബ്ദങ്ങൾ കേട്ടപ്പോൾ, നയനങ്ങളിലെ ജലം സമുദ്രങ്ങളായും ആ സമുദ്രങ്ങളുടെ ആരവവും കർണ്ണ ഗോചരമായി. നരസിംഹാവതാരവും ഭക്തനായ പ്രഹ്ളാദനും രാവണവധവും രാമഭക്തനായ ഹനുമാനും ഋഷഭവാഹനത്തിൽ ഏറിയിരിക്കുന്ന ശങ്കരഭഗവാനും രമാപതിയായ വിഷ്ണുഭഗവാനും ബ്രഹ്മദേവനും ആ രൂപത്തിൽ തെളിഞ്ഞു നിന്നു.ഭഗവാന്റെ വാക്കുകൾ വേദങ്ങളായി ഉയർന്നു കേട്ടു.
മഹിഷാസുരനെ വധവും മഹിഷീമർദ്ദനവും മഹിഷിയെ മഞ്ചമാതാവായി വാഴിച്ചതും ശബരിമലമേലുള്ള ദിവ്യക്ഷേത്രവും പരശുരാമമഹർഷി അവിടെ അയ്യപ്പ സ്വാമിയുടെ ദിവ്യ വിഗ്രഹം പ്രതിഷ്ഠ ചെയ്യുന്നതും വിശ്വരൂപത്തിൽ കാണുമാറായി.യുഗങ്ങൾ തോറും ഭഗവാൻ ആടുന്ന സകലലീലകളും ആ ദിവ്യരൂപത്തിൽ മാറി മറഞ്ഞു വന്നു.
വിശ്വരൂപദർശനത്തിലൂടെ, താൻ ഉൾപ്പെടുന്ന സകല ചരാചരങ്ങളും, ഒരു ഈശ്വരശരീരത്തിലെ അഭിന്നങ്ങൾ ആയുള്ള അവയവങ്ങൾ ആണെന്ന് ഭക്തർക്ക് ബോധ്യമാകുന്നു . ഈശ്വരന്റെ മഹിമ അദ്‌ഭുതകരം തന്നെ!