ശരണമന്ത്രമാഹാത്മ്യം

മനുഷ്യശരീരത്തിലെ ആറു പടികളാണ് മൂലാധാരം, സ്വാധിഷ്ഠാനം, മണിപൂരകം, അനാഹതം, വിശുദ്ധി, ആജ്ഞാ ചക്രം. മനുഷ്യൻ ലോഭമോഹങ്ങളിൽ പെട്ടുഴലുമ്പോൾ ഉള്ളിൽ നിറഞ്ഞിരിക്കുന്ന ഈശ്വരീയ ശക്തിയെ വിസ്മരിച്ചു പോകുന്നു. ഈ ശക്തി മൂലാധാരസ്ഥിതമായി വർത്തിക്കുന്നു.ജപധ്യാനാദികളിൽ കൂടി ഈശ്വരീയ ശക്തിയെ ഉണർത്തി,ആറ് ചക്രങ്ങളും ഭേദിച്ച് മുകളിൽ എത്തുമ്പോൾ അയ്യപ്പസ്വാമിയിൽ മനസ്സ് പൂർണ്ണമായും രമിക്കുന്നു. സ്വാമിയേ ശരണം അയ്യപ്പ എന്ന നവാക്ഷരീ മന്ത്രസാധന ഓരോ ഭക്തനേയും ഇതിനു പ്രാപ്തനാക്കുന്നു. എന്താണ് നവാക്ഷരീ മന്ത്രത്തിന്റെ അർത്ഥം ?
സ – സർവദാ സർവത്ര പൂർണ തേജസ്വിയായ് തിങ്ങിവിളങ്ങുന്ന ശക്തിസ്രോതസ്സിനെ സൂചിപ്പിക്കുന്നു. ഇതിൽ നിന്നും ‘സ്വ’ എന്ന രൂപം ജനിക്കുന്നു
മ – മ കാരം അമൃത സ്വരൂപമായ ശിവനെ സൂചിപ്പിക്കുന്നു. മ കാരം ‘മി’ എന്ന വർണത്തിന് ജന്മം നൽകുന്നു
യ – യ കാരം മരണഭയത്തിൽ നിന്നും കരകയറ്റുന്ന ‘നാരായണ’ മന്ത്രത്തെ സൂചിപ്പിക്കുന്നു. ‘യേ’ എന്ന പ്രാർത്ഥന ഇതിൽ നിന്ന് ആവിർഭവിക്കുന്നു.
ശ – ശിവമയമായ ശക്തിസ്വരൂപമാണ്.
ര – ശബ്ദ പ്രപഞ്ചത്തെ സൂചിപ്പിക്കുന്നു
ണ – സർവ ഐശ്വര്യ പ്രാപ്തിയെ സൂചിപ്പിക്കുന്നു
അ – പ്രണവമന്ത്രമായ ഓം കാരത്തിലെ സൃഷ്ടിയെ സൂചിപ്പിക്കുന്നു
യ്യ – മായയെ അതിവർത്തിക്കാൻ ഉള്ള ശക്തി ആകുന്നു
പ – “പ” കാരോ പാപനാശന – പാപനാശനത്തിനെ കാണിക്കുന്നു
ഈ ഒൻപതു അക്ഷരങ്ങളിൽ കൂടി നവാക്ഷരീമന്ത്രമായ ‘സ്വാമിയേ ശരണം അയ്യപ്പ ‘ ആഭൂതമാകുന്നു. ആ മന്ത്രത്തിന്റെ രഹസ്യം മനസ്സിലാക്കി ഭക്തിയോടും ശുദ്ധിയോടും കൂടി സത്യം തേടിയെത്തുന്ന ഭക്തന്, പഞ്ചഭൂതങ്ങളുടെ നാഥനായ അയ്യപ്പൻ ജീവിത വിജയത്തിനും ശ്രേയസ്സിനുമുള്ള നേര്‍വഴിയാണ് കാണിച്ചുതരുന്നത്.