ചിന്മുദ്രയുടെ തത്വം

പതിനെട്ടു തത്വസോപാനങ്ങൾ കയറി അയ്യപ്പ സന്നിധിയിൽ എത്തി ഭഗവാന്റെ മനോഹര രൂപം ദർശിക്കുന്ന ഭക്തൻ ആനന്ദനിർവൃതിയിൽ ആറാടുന്നു. നീലപ്പട്ടണിഞ്ഞു സുന്ദരകളേബരനായിരിക്കുന്ന ഭഗവാനെ ദർശിക്കുവാൻ സാധിക്കുന്നത് 41 ദിവസം പിന്തുടർന്ന് വന്നിരുന്ന വ്രതപുണ്യത്തിന്റെ ഫലം തന്നെ! ഊർദ്ധ്വപത്മാസനത്തിൽ ഇരിക്കുന്ന ഭഗവാന്റെ തിരുരൂപത്തിൽ, കിരീടം പോലെ ശോഭിക്കുന്ന ജടാമകുടവും സുന്ദരമായ മുഖാംബുജവും ശ്രീവത്സശോഭിതമായ തിരുമാറും ചിന്മുദ്രയെ ധരിചിരിക്കുന്ന വലം കയ്യും യോഗപട്ടയും കാണുവാൻ ഭക്തന് സാധിക്കുന്നു.
ക്ഷണികങ്ങളായ ലൗകിക ബന്ധനങ്ങളിൽ നിന്നും പുറത്തുകടന്ന് തന്റെ നിലനില്പിനാധാരമായ ഈശ്വരശക്തിയെ ധ്യാനത്തിലൂടെ അറിയൂ എന്ന അറിവാണ് തപസ്വിയായി ഇരിക്കുന്ന അയ്യപ്പസ്വാമിയുടെ മംഗളരൂപം ഭക്തന് നൽകുന്നത്.
ചിന്മുദ്ര ജ്ഞാനത്തെ പ്രതിനിധീകരിക്കുന്നു. 41 ദിവസത്തെ വ്രതചര്യയിലൂടെ മനസ്സും ശരീരവും ശുദ്ധമാക്കി ശബരിമല സന്നിധാനത്തിലെത്തുന്ന ഭക്തനോട്, നീ തേടുന്ന ഈശ്വരൻ നിന്നിൽ തന്നെ കുടികൊള്ളുന്നു എന്ന അറിവാണ് ജ്ഞാനമുദ്രയാകുന്ന ചിന്മുദ്രയിലൂടെ അയ്യപ്പസ്വാമി നമ്മൾക്ക് കാട്ടിത്തരുന്നത്.
ചെറുവിരൽ, മോതിരവിരൽ, നടുവിരൽ എന്നിവ നിവർത്തിപ്പിടിച്ച്‌, ചൂണ്ടു വിരൽ തള്ളവിരലിനോട്‌ ചേർത്ത്‌ വൃത്താകാരമായി വെയ്ക്കുന്നതാണ്‌ ചിന്മുദ്ര. ചെറുവിരൽ, മോതിരവിരൽ, നടുവിരൽ എന്നിവ ഭക്‌തിയേയും ശുദ്ധിയേയും ആത്മസമർപ്പണത്തെയും പ്രതിനിധാനം ചെയ്യുന്നു. ചൂണ്ടുവിരൽ തള്ളവിരലിനോട്‌ ചേർത്ത്‌ വൃത്താകാരമായി വെച്ചിരിക്കുന്നത്‌, മുകളിൽ പറഞ്ഞ മൂന്നു ഗുണങ്ങളോട് കൂടിയ ഭക്തന്, പ്രപഞ്ചനിയതാവായ അയ്യപ്പനിലേക്കു സ്വയം ലയിക്കുവാൻ സാധിക്കും എന്ന ഉപദേശം പകർന്നു നൽകുന്നു.